الحاجة الوحيدة اللي قدرت عليا...

الواحد طول ما هو عايش في الدنيا دي بيمر بتجارب كتير ، منها الحلو و منها الوحش بس في كل الاحوال ،لازم نتعلم منها و نتدبر. في تجارب بنطلع منها متغيرين للاحسن و تجارب بنطلع منها للاسوء، كل واحد و شطارته و حكمته.

الغُسل من التجارب اللي بتعّلم فينا و بنتعلم منها. تجربة بتهذب الروح، تصفي النية، ترقق القلب و تنور البصر و البصيرة. بشكر ربنا انه الهمني بيها.

الحقيقة انه من ساعة ما بدأت اغسّل وانا و اللي حواليا حاسين اني اتغيرت كتير جداً! في اعتقادي ان الغسل هو الحاجة الوحيدة اللي قدرت عليا. كل التجارب اللي عديت بيها قبل كده بحكم شدتها، كنت بطلع منها انشف و اقوي و ده كان بينعكس عليا كشخص. الغسل التجربة الوحيدة اللي طلعت منها بقلب لين و نفس مستكينة.

كمان الغسل فاهمني اد ايه الدنيا دي ولا حاجة ومن ساعة ما شوفت اخرتنا في الكفن و ازاي بنبقي helpless من غير كل الحاجات اللي كنّا فاكريين انها ساندانا و ازاي الناس اللي كانت واقفة في ظهرنا بقت واقفة حوالينا و ردود افعال متافوته بقي عندي يقين ان مفيش حاجة دايمة، غير سيرتنا الطيبة.

الغسل خلاني بقيت مش عاوزة انام زعلانة من حد او مزعله حد. بقيت عاوزة احاول لاخر لحظه عشان مبقاش محاولتش. بقيت بسامح و مبشيلش من حد و بحط اعذار، مبقتش عاوزة اخسر حد عشان جماد. بقيت بفكر و بقدر و بفترض حسن النية. بقيت بحاول اغير و اتغير. بحاول ابقي احسن و اعمل الصح ليا و لغيري. بقيت لما ادعي ربنا لما احس بظلم اقوله حاسبهم بنيتهم مش بافعالهم. بقيت مفوضه اموري كلها للمطلع و متوكله عليه. بقيت بدور علي الحلو اللي جوه الناس عشان بقيت عارفه ان ناس كتير براهم غير جواهم و ان ربنا خلقنا كلنا علي الفطرة السليمة .بقيت عارفة ان اللي بعامله بقلبي الابيض و مش بيشوف بياضه ده نظارته اتلحوست من الدنيا و الناس و عمايلهم. مبقتش بزعل من الناس اللي بتسئ الظن فيا عشان بقوا يصعبوا عليا انهم متلخبطين للدرجة.
بقيت ابسط و اسهل عشان الدنيا صعبة من غير حاجة. بقيت بدي من غير مستني حاجة. بقيت بدفع بالتي هي احسن و بقابل الوحش بالحلو. بقيت بخاف من الظلم، و بخاف اظلم حد من غير ما اقصد عشان عارفة الظلم ظلمات يوم القيامة. بقيت بخاف اقول كلمة اكسر بيها خاطر حد حتي لو من غير ما اقصد. بقيت مبحكمش علي حد و بشوفهم زي ما هما مش زي ما انا عاوزة اشوفهم. بقيت بدور علي الحق و اقول الحق عشان ارضي ضميري. بقيت عارفة انه الصح و الغلط مش ثوابت و ان شرع ربنا و منهجه هو الشئ الثابت الوحيد اللي نرجعله لما نختلف. بقيت عارفة انه اي حاجة كويسة ده رزق من ربنا مش شطارة مننا. بقيت بتفرج علي الناس و هي واقفة حوالينا و احنا بنغسّل و اقول لنفسي عاوزة الناس تفتكرك بايه يا نور.. بقيت بسأل نفسي عاوزة تقابلي ربنا علي ايه يا نور. بقيت بحاسب نفسي كتيير، و لما اغلط باعتذر و لما اقصر ف حق من حقوق ربنا اتوب. بقيت بحب ربنا اكتر و شايفة ايده في كل حاجة و عندي يقين ان ربنا ارحم و اكبر و الطف من كل تخيلتنا. بقيت دموعي قريبة و قلبي لين و تفكيري ارحم باللي حواليا حتي لو لسه لساني مش مطوعني.
مبقتش خايفة اموت عشان عرفت ان الموت مفيش منه مفر و انه مهما حولت مش هبقي مستعده لكن جوايه عارفة اني حاولت و جاهدت و وقعت و 

قمت و قصرت و تبت و غيرت و اتغيرت و مقصرتش في حق نفسي او حق غيري.

الحمد لله حمداً كثيراً مباركاً