رسائل ربانية ..

اوقات ربنا بيحطنا في مواقف صعبة عشان عاوزنه نرجعله و ندعيله ما هو اللي قال "وَإِذَا سَأَلَكَ عِبَادِي عَنِّي فَإِنِّي قَرِيبٌ أُجِيبُ دَعْوَةَ الدَّاعِ إِذَا دَعَانِ" ، خلينا ندعي و ربنا مش هيخيب ظننا ابدا ما هو مفيش احسن من سجدة تكلم ربنا فيها و تقوله علي اللي في قلبك عسي انه يرزقنا راحة البال و القلب.. و لو عاوز حاجة اوي في حياتك اصبر عليها و اتقي ربنا فيها ، هتيجي في وقتها لو كانت نصيبك،و افتكر ديما ان ربنا قال "يَا أَيُّهَا الَّذِينَ آمَنُوا اصْبِرُوا وَصَابِرُوا وَرَابِطُوا وَاتَّقُوا اللَّهَ لَعَلَّكُمْ تُفْلِحُونَ " ان شاء الله هنفلح بس المسألة مسالة وقت. و لو الناس مستعجلة في كل أمور حياتها زي حالاتي ، وكل حاجة بتجلها بسرعة و تروح منها بسرعة و مش فاهمة ليه بتروح افتكروا ديما ان الصبر مفتاح الفرج و ربنا قال "فَصَبْرٌ جَمِيلٌ" و الاخير ربه كريم و لو زعلان من حاجة و قلبك وجعك عشان مش فاهم ليه حصلت. افتكر ان ربنا برضه قال "وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُونَ" سيبها علي ربنا و الله ما في احسن منه يدبرهالك ..و لو عندك مشكله كبيرة في حياتك او مواقف حاسس انه اكبر منك ، و حاسس انك مش عارف تعمل ايه و انه حياتك وقفت و ان الدنيا مش هتمشي عشان مش قادر تزق اكتر من كده ، افتكروا دايما " لا يُكَلِّفُ اللَّهُ نَفْسًا إِلَّا وُسْعَهَا " لو كان ربنا مش شايفنا قدها ماكنش حطنا فيها بس ساعات لازم نتحط في مواقف فاكرينها اكبر مننا عشان نعرف نتطلع احسن ما جوانا اللي هو بتدبير ربنا بيطلع اكبر من اللي كنا فيه. و لو الحاجة دي طولت و نهايتها معجبتاكش و كان نفسك في حاجة تانية افتكر تاني ان ربنا اللي قال" لَا تَدْرِي لَعَلَّ اللَّهَ يُحْدِثُ بَعْدَ ذَلِكَ أَمْرًا" في كل الاحوال ده الخير اللي ربنا قادرهلنا و مفيش احسن من تقدير ربنا .. ما هو الواحد مهما كانت ظروفه او حياته مش هيلاقي احسن من ربنا يكون وكيله افتكروا ديما ان ربنا قال" وَتَوَكَّلْ عَلَى اللَّهِ وَكَفَى بِاللَّهِ وَكِيلاً" عايز ايه احسن من كده :) ؟. الواحد مش هيلاقي احسن من ربنا يرمي توكاله عليه.. و لما تعمل خير و ميتقدرش افتكر انك عامله لربنا و اللي عند ربنا مبيروحش ما هو ربنا اللي وعدنا ان اللي عنده بيتضاعف في قوله تعالي "مَّن ذَا الَّذِي يُقْرِضُ اللَّهَ قَرْضًا حَسَنًا فَيُضَاعِفَهُ لَهُ أَضْعَافًا كَثِيرَةً" .. كل اللي فات ده رسايل من ربنا لينا و وعود لو نفهمها والله بالنا يرتاح و افتكروا ديما " وَعْدَ اللَّهِ لا يُخْلِفُ اللَّهُ وَعْدَهُ وَلَكِنَّ أَكْثَرَ النَّاسِ لا يَعْلَمُونَ" بس احنا اللي غوين شقي !