بحب الناس الجدعة

بحب الناس الجدعة ، اللي في زعلهم بيقفوا جمب نفسهم و مبيستنوش حد، و لما بيقعوا بيحاولوا يرجعوا يقفوا أوام ، اللي بيخافوا من الخساير بس لما بيحبوا حد او حاجة مش بيسبوا خوفهم من الخسارة يكسبهم، اللي عندهم الشجاعة انهم يعملوا حاجة و يقولوا حاجات محدش مستنيها او متوقعها منهم بس بيخدوا الخطوة الاولي عشان ميرجعوش يقولوا يا ريتنا، اللي بيطاولوا في الكلام و تفضل دماغهم مسواحهم و يروحوا و يجوا عشان يدوا الناس فرص لأخرها، اللي بيفضلوا صابرين لحد ما الصبر نفسه يجيب اخره، اللي مبيعندوش عشان عارفيين ان خساير العند تقيلة بس برضه مسبوش نفسهم يتسحلوا و بطالوا يعافروا في السكة الغلط، اللي مبيعرفوش يضحكوا في وشك و هما زعلانين منك عشان علي قد المعّزة علي قد الزعل، اللي مبيقدوش واجب و لما بيعملوا حاجة بيعملوها من القلب، و اللي بيعملوا الصح حتي لو هيجوا علي نفسهم و علي انبساطهم عشان في الأخر يبوصوا لنفسهم في المرايا و يقولوا "عاش" ..