كل متوقع ات...

" محدش بيتغير " "من شب علي شئ شاب عليه" و الجمل السلبية الكتير اللي بنصدقها و بندخلها عقلنا الباطن نتعمل منها، و نصدر احكام علي غيرنا..

ربنا قال "ان الله لا يغير ما بقوم حتي يغيروا ما بأنفسهم" .. سيدنا النبي قال في ما معناه اذا اراد الله بعبده خيراً (بصره بنفسه، بصره بعيوبه ، جعل له من نفسه واعظاً يأمره و ينهاه" ، سيدنا علي بن ابي طالب قال "كل متوقع ات" و برضه قال " تحسب انك جرم صغيرا و فيك انطوي العالم كله" ، ربنا جعل الغيبة (اللي هي ذكر اخيك بما فيه لكنه يكره)من الكبائر عشان الناس لما تتغير متتوصمش بحاجة مبقتش موجودة.

الموضوع كله اننا من جوانا محتاجين نتصالح مع نفسنا عشان نعرف نصارحها بعيوبها و اخطأها، نعرف "ان خير الخطاؤون التوابون" و نقرر اننا  “evolve to our best versions to-date” عاوزين ن 

و ربنا هيدينا اللي يساعدنا، ييسرلنا الامور و يسخرلنا الطرق

و اذا لسه ربنا مفتحش علينا و فضلنا كده، منكسرش مأديف غيرنا، و يا ريت نسيب اللي بيجاهد و مش بييأس ، بيحاول و يعافر مع نفسه ، اللي بيوقع و يقوم و مش عاوز حاجة من حد، نسيبه في محاولاته و منقولوش الكلام الخايب اللي بنقوله لنفسنا عشان نسكت ضميرنا
نعمل بقول سيدنا النبي "فلتقل خيراً او لتصمت" او الاحسن "من حسن اسلام المرء تركه ما لا يعنيه" و اشغل نفسك بنفسك، اصلنا مش هنعرف اكتر و احسن من ربنا و سيدنا النبي و اهل البيت.. و

استقيموا و خليكوا في حالكم يرحمنا و يرحمك الله!

هذه الحياة اشد رعباً..

"لم يعد الموت مرعباً،  هذه الحياة اشد رعباً"

هي مش الحياة اللي اشد رعباً، هي الناس اللي بقت مرعبة اكتر من الاتنين!
من اكتر الحاجات اللي بتخوفني في الدنيا دي الناس، و ازاي قلوبهم و نفوسهم ممكن تتغير! و يبقي عندهم قدره علي القساوة، و قدره انهم يستقوا علي بعض، او حتي انهم يهونوا علي بعض. حاجة مرعبة بكل المقايس للناس اللي زي ان يبقي لينا حد من اهلنا او قرايبنا او صحابنا او حتي معارفنا كده.

الحقيقة، الفكرة نفسها مرعبة اوي..  انك تعيش حياتك خايف تهون عليهم و خايف يمشوا، و خايف تسند عليهم و يهون عليهم يسبوك تقع. عارفين انك محتاج حضن او طبطبه و مستخسرينها فيك. عارفين انك واقف في ظهرهم و سايب ظهرك مكشوف و برضه يسبوك، وعارفين نقط ضعفك و يستقوا عليك فيها و عارفين طيبة قلبك و بيعرفوا يقسوا عليه. تلجألهم و يسيبوا  ايدك و يسبوك تايه في نص الطريق. تشوف الدنيا من عينهم فيغمضوا عشان يضلموها عليك، تركن لهم و هما مستتئلين ركنتك. معرفش ازاي  الناس بتعمل كده و مش هفهم ليه ممكن نطحن في بعض  مفيش اي مبرر!
القساوة بتجرح القلب، و الهوان بيكسر النفس و الخذلان بيقطم الظهر، الجفا بيخلي المحبة تقل و قلة الامان بتطفي العين و الروح.

و الحقيقة اني شخصياً جربت ابقي كده و اعمل زي الكبار و بجد معرفتش و خفت و مش عاوزة اعيش حياتي كده وسط الناس دي.. فعلاً ربنا يحفظنا و يبعدنا عنهم و يبعدهم عننا و ميحوجناش ليهم ..

ليس كما نراه..

أتعجب مما يفعله البشر، كنت أظن أن الفراق الوحيد في الأرض هو الموت، وكنت أظن أن الموت الوحيد يعني دفن الجسد في الأرض، صغيرًا كنت أم ساذجًا لا أعرف، لكني كنت أؤمن أن كل المتحابين يتزوجون وكل الذين يضحكون في وجهي يحبونني، وأولئك الذين يعاهدوننا بالبقاء لا يرحلون عنا أبدًا، هذه النظرة الوردية التي ظلت في ذهني حتى تلاشت رويدًا رويدًا بعدما عرفت الحقيقة، بعدما عاشرت الواقع وتعلمت أن,
الحب ليس سببًا كافيًا للزواج..
أن الفراق لا يعني دائمًا النسيان..
الحزن لا يسكن القلب بل يأكله..
لن يحبك أحد في العالم مثل أمك..
كل شخص يعرف نقطة ضعفك يمكنه إيذائك..
الأصدقاء ليس بكثرة عددهم إنما بوجودهم في المواقف الصعبة..
العالم لن يملأ فراغات قلبك، شخصٌ يحبك يستطيع فعل ذلك..
ثمة نساء إن تألمت صمتت، وإن صمتت تغيرت، وإن تغيرت لن تعرفها..
ثمة نساء يَمِتنَ بالقسوة ويولَدنَ بالحب..
ثمة نساء إن رحلوا لا يَعُدْنَ أبدًا...
وجع الرجل أشد قسوة من حزن وبؤس النساء..
بداخل كل رجل امرأة تسببت في إيذائه ورغم ذلك يعشقها..
من رحم الحزن يولد الإبداع..
البكاء رفاهية لا يمتلكها البعض..
الخذلان يجعلنا أشخاصًا مضطربين لا نثق في أحد..
الانتظار موت بطيء لا حياة بعده..
ألد أعدائك من الممكن أن يكون أوفى أصدقائك والعكس وارد..
لا تقسُ على فتاة تراك بمثابة عالمها فثورتها قد تهدم كل شيء..
الأشياء الجميلة دائمًا تأتي متاخرة، لكن لا فائدة منها إن أفسدها الانتظار..
الحضن أضيق الميادين اتساعًا..
يضيق العالم إن لم تكن تملك ركن هادئًا تنهار بداخله في صمت..
نحن نموت من الوجع من الحزن والخذلان والفراق و القساوة حتى موتنا الأخير..
أشد الحروب قسوة تلك التي تدور بين شيخوخة عقلك وطفولة قلبك..

تعلمت الكثير والكثير والكثير، وما زال للحديث بقية...

وأنت ماذا تعلمت من الحياة..؟

الكاتب/محمد طارق.

حاجات بتموتنا و احنا عايشين!

"الخوف لا يمنع من الموت لكنه يمنع من الحياة" نجيب محفوظ

(وَلَنَبْلُوَنَّكُمْ بِشَيْءٍ مِنَ الْخَوْفِ)

الواحد شاف الاية دي كتير اوي بس عمره ما شاف الحكمة ولا فهم السر من تقديم الخوف علي بقية الحاجات، و مش هيفهمها غير اللي زعلان علي حد خايف.

ربنا قدم الخوف علي جميع الابتلاءات الاخري لانه الحقيقة اكبرهم تأثيراً علي النفس و اقساهم علي القلب.

الناس فاهمة ان الخوف الوحيد اللي يعتبر ابتلاء هو خوفنا من الناس المؤذية، مع ان ده اخفهم علي الاطلاق، لان لما حد هيأذيك ربنا هيجبلك حقك. في حاجات تانية الناس بتخاف منها، اكبر و اصعب بكتير من اذي الناس ليهم، و هو اذاهم لنفسهم بنفسهم. الحاجات دي بتموتنا كل يوم و احنا عايشين حرفياً، زي الخوف من بكرة، الخوف من التغير، الخوف من اتخاذ القرارات، الخوف من قول كلمة الحق، الخوف المرضي علي اللي بنحبهم، الخوف من اننا نغلط،الخوف علي منظرنا، الخوف علي حاجات كلها تكاد تكون فارغة. الخوف بيوقفلنا حياتنا و تفكيرنا، بيخلينا منسعاش للي احنا بجد عاوزينه عشان خايفين منوصلش او منعرفش او منقدرش، بيخلينا ننسي اننا مأمورين اننا نتوكل علي الله و نؤمن بالقدر كله خيره و شره ، بيخلينا ننسي ان ربنا عند ظننا بيه، الخوف من الابتلاءات في الايمان و العقيدة.
اظن ان كل اللي فوق ده كفايه انه يخلي الخوف اول كلمة.طيب ايه الحل؟؟

الحل اننا نبسط و نسهل الامور، او زي ما انا بقول ديماً ” it is as simple as that” اصل الواحد هيخسر ايه ، اصلاً الخسارة في اغلب الاحوال بتكون مكسب!

طيب نكلم جد شوية..

(وَلَنَبْلُوَنَّكُم حَتَّى نَعْلَم الْمُجَاهِدِينَ مِنْكُمْ وَالصَّابِرِينَ )

محتاجين نفهم ان الابتلاء مش شر، ولكن الشر هو أننا نقع في الابتلاء، فكل ابتلاء هو اختبار وامتحان، محنة و منحة، عمر ما حد قال: إن الامتحانات شر،اللي مذاكرش هيشوفها شر،و اللي اجتهد و نجح هيشوفها خير بالنسبة له.
عشان كده الابتلاء/الامتحان لما بيجي لازم له جهاد و سعي و صبر عشان نشوف المنحة.  نجاهد نفسنا انها تفتكر انه كله علي ربنا، نسعي اننا نفهم و نصبر عشان المنحة ، في اعتقادي البسيط انه هو ده الحل.

ملخص الكلام :
( يا غُلامُ إنِّي أعلِّمُكُ كَلماتٍ : احفَظِ الله يَحْفَظْكَ ، احفَظِ الله تَجِدْهُ تجاهَكَ ، إذا سَأَلْت فاسألِ الله ، وإذا استَعنْتَ فاستَعِنْ باللهِ ، واعلم أنَّ الأُمَّةَ لو اجتمعت على أنْ ينفعوك بشيءٍ ، لم ينفعوك إلاَّ بشيءٍ قد كَتَبَهُ الله لكَ ، وإنِ اجتمعوا على أنْ يَضرُّوكَ بشيءٍ ، لم يضرُّوك إلاَّ بشيءٍ قد كتبهُ الله عليكَ ، رُفِعَتِ الأقلامُ وجَفَّتِ الصُّحُفُ )

كن أنسانا و كفي..

~لَو دخلَ كُل منّا قلب الآخر لأشفق عليه~

"إحنا ربنا حط فينا بؤرة نور من يوم ولادتنا لغاية ما نموت.. سميها الفطرة.. سميها النفس الحقيقية، سميها قبس من روح الله.. سميها زى ما تسميها.. النور ده مش بينطفى أبداً مهما اتعرض لرياح وأعاصير وزلالزل نفسية مهما كانت عنيفة.. ممكن يخفت شوية، ممكن يتوهج شوية.. لكنه مش بينطفى أبداً.. حتى بالموت.. هو بس بيرجع لصاحبه الأصلى اللى خلقه وزرعه فيك”

فطرة ربنا مش بتتشوه بسهولة.. البنى آدمين مش زجاج بيتكسر مع أول خبطة..

جهاد النفس (الجهاد الأعظم) ليه أشكال ومستويات..
لما الفطرة تتوه جهادك انك ترجع للاصل تحافظ علي فطرتك انها تفضل سليمة..

عشان إحنا جوانا قدرة هائلة على المقاومة.. ودوافع انسانية فطرية جبارة على التغيير.. وقوة جذب رهيبة نحو الحياة..

لازم نعرف انه مفيش حد وحش، ربنا بيحوطنا في طريق ناس و في دروس صعبة و مواقف مؤلمة عشان نتعلم حاجة.كل مرة فهمنا ايه الحاجة دي بنغير فينا و بن evolve لنفس جديدة احسن من اللي قبلها، نفس عندها القدرة علي الحب ، ال acceptance و التسامح.لكن في بني ادم قدرته علي التحمل ضعيفة،فا لما شاف الوحش متعلمش الدرس و خاف، و معرفش يسند نفسه او يسمحها ولا لقي حد يسنده. قلة السند و الخوف بتأذي و تخليه يأذي اللي حواليه. و هيفضل الدرس بيتكرر طول ما مبنتعلمش و دايرة الاذي مبتقفش.

و الحقيقة اكبر ظلم ممكن تظلمه لنفسك هو انك تكون نسخة من اللي ٱذاك
واكبر انتصار عليك من حد ظلمك ... هو إنه يحولك لنسخة منه ..

عشان ده ميحصلش لازم نتطبق الاتي:
اللي اذاك مش قاصدك انت، فمتزعلش منه، ازعل عليه عشان اللي يوصله انه يبقي كده اكيد مش قليل و احمد ربنا انك متحطتش مكانه.لو حكمت عليه الدنيا هتلف و تحطك مكانه و ساعتها ابقي افتكر توقف الدايرة عندك و ادعي لنفسك و ادعيله، خليك انت مصدر النور لما روحه و قلبه يضلموا.

و افتكر ديماً:
"أدب الناس بالحب.. فمن لم يؤدبه الحب يؤدبه المزيد من الحب ..لا لأنهم هم ..
لأنك أرقى ..لأنك أنقى .. لأنك تعامل الله فى الآخرين .. لأن الموت والحياة قد تفصلهما لحظة تبعثر كل الأشياء ولا وقت لنا للندم على إنسانيتنا التى كانت أكبر من كل شىء يتضاءل جانبها .. لأنك تعامل الناس بأخلاقك لابأخلاقهم "

يا رب نور!
يا رب سند!
يا رب بصيرة!
يا رب سكينة!

اصل ربنا عاوز كده!

"اصل ربنا عاوز كده"

الجملة دي من اكتر الجمل اللي الناس بتعلق عليها قلة سعيها علي الرزق اي ان كان نوعه عشان يسّكتوا ضميرهم و يفهموا نفسهم انهم عملوا اللي عليهم بس ربنا كاتبلهم كده، و نسيوا ان ربنا اللي قال (انا عند ظن عبدي بي ان ظن خيراً فله و ان شراً فله) و برضه قال ‏{وَأَن لَّيْسَ لِلإنسَانِ إلاَّ مَا سَعَى‏}‏

اكتر مثلين بحطهم قدامي للموضوع ده صديق محترم جداً كان نفسه يشتغل في شركة معينه، فضّل يقدم فيها علي مدار ٤ سنين و كل مرة يترفض لاسباب مختلفة بس ميأسش و مقلش كفاية كده انا كبرت ولا انا فاشل او حتي اكيد ده اللي ربنا عاوزه، و فضل يسعي و يغير في نفسه و يطور منها و يلح علي ربنا لحد ما فعلاً وصل بس في المعاد الاصلح و الانسب له.

المثل تاني صديق عزيز جداً انفصل عن مراته و رجعوا بعد سنين سألتوا اشمعني بعد كل ده رجعت قالي عشان محبتش ولا عوزت احب حد غيرها و كان لازم ده يحصل عشان نتغير، سعيه في الموضوع ده مختلف، لانه اقرب لجهاد النفس، كان سعيه انه يتعلم الدرس و يعرف انه محتاج يغير في نفسه حاجات و هي كمان عشان ربنا يرزقهم ببعض تاني.

في اعتقادي المحدود جداً الحصول علي اي رزق متوقف عليك كشخص و علي قدرتك انك تحافظ عليه، لو مستعدله و جاهزله ربنا بيديهولك باقل مجهود منك عشان عارف انك مش هتضيعوا منك و لو مش مستعد هتحتاج تسعي و السعي هنا هو انك تجهز نفسك بنفسك و تثبت انك جاهز له و قده عشان لما يجيلك اللي نفسك فيه ميروحش باللي مش فيك!

معادلة الوصول للرزق بسيطة : سعي + اخد بالاسباب + توكل علي الله + يقين في نفسك و في طلبك و في استجابة ربك.

استقيموا و اسعوا يرزقكم و يرزقنا الله!