Excerpts of my 31 birthday

‏
Excerpts of my 31! مين  نور

الحقيقة اني  بعد اللي عديت بيه السنة اللي فاتت ، اقدر اقول اني تميت "١" مش  "٣١" ابداً ..
حاسه اني اتولدت من جديد. حاسه اني شخص جديد، اكتشفت في نفسي حاجات تانية و اكتشفت اني قوية.
الحقيقة اني محظوظة لانه احياناً ربنا بيبعتلنا حاجات في طريقنا تصحينا لنفسنا في وقت احنا اصلاً فاكريين فيه اننا صاحيين. انا ال ٣٠ سنة  اللي فاتوا متعلمتش فيهم قد اللي اتعلمتوا ال ٥ شهور اللي فاتوا.
و سبحان الله مدبر الامر  - ان كل حاجة خططها اتلخبط ، و ده كان درس لل perfectionists امثالي انه احنا الحقيقة خوافيين و مهما حوالينا نسيطر  عشان الدنيا تمشي بالسنتي عشان احنا خايفين ربنا هو  المسيطر و المهيمن الوحيد !

"من جمال الحياة أن الله يبعث في طريقك ما يُوقظك بين الحين والآخر ، أنت الذي ظننت لوقت طويل أنّك مستيقظ تماماً !"

نبدأ بسم الله!

١- حب الناس نعمة كبيرة اوي!
الحب اللي بجد اللي مليان رحمةو دعاوي من القلب، زي دعوة طنط انجي حبيبتي لما تقولي "انتي في حفظ الله" او لما ام محمد  تقولي "اللي فيكي يجي فيا" ولا  بدرية لما تقولي "يكفيكي شر الغفلة" ولا دعوة علا " يا رب فرحة متصدقيش نفسك من كترها" و لا دعوة ال waiter  " يا  رب السنة دي يبقي فيها  كل اللي انتي عايزه"  و دعوة فايزة حبيبتي " ربنا يجعل في وشك القبول" و دعوة عطعط " ربنا ينصرك " و وجدي اللي بيركني عند ستاربكس وبتاع المكتبة لما قالي ربنا ينجح مقاصدك و علاء و صفاء و تهاني  و دعاوي تانية كتيرة فيها محبة فوق الوصف.

٢- القلب النظيف ده رزق!
القلب اهم من اي حاجة. متخليش قلبك زي ما الناس عاوزاه. خليه ديماً ابيض، خليه مليان خير، حب متكرهش، الناس المؤذية ازعل عليهم مش منهم . متخليهوش ناشف زي الحديد خليه من طين، عشان لما تمطر عليك قلبك يورد ميصديش!

"عندما أخبرته أن قلبي من طين سَخِر مني، لأن قلبه من حديد. قريباً ستُمطِر، سيُزهرُ قلبي .. وسَيَصدأ قلبه"

٣- لين، هين، سهل، قريب من الناس!
انا ممكن مبقاش اشطر واحدة بس مؤكد اني بحاول، ممكن مبقاش ناجحة و بفشل كتير ، بس الاكيد اني شجاعة كفاية اني اعتذر لما افشل اكون حاجة منهم.  يا رب اكون لينه بس متكسرش، هينه من غير ما تصعب عليا نفسي و سهلة من غير ما حد يستضعفني و قريبة منك. امين.

٤-اي نور تتركه داخل احدهم يضيئك !
حاجات بسيطة و مش بسيطة، لازم نساعد بعض بكل الطرق الممكنة و الغير ممكنة.. احنا موجودين عشان نهون علي بعض الطريق لا اكتر ولا اقل. متصعبوهاش علينا و علي بعض هي صعبة من غير حاجة 🙂

٥- اترك اثراً!
ربنا خلقنا كلنا لسبب ، المحظوظ فينا اللي يوصلوه، دور عليه، هتلاقيه جواك او مثلاً في اسمك زي ما انا لاقيته 🙋🏻‍♀️

٦- صحتك و ايمانك هما اللي باقيين لك!
طنط انجي حبيبتي ديماً تقولي كده، و الحقيقة احب ازود عليهم نفسك. محدش هيسندك غير نفسك، محدش هيخاف عليك قد نفسك، و محدش هيشيلك لما تقع غير نفسك. نفسك دي اللي هي انت، ابوك و امك و اخواتك و صحابك اللي روحك و روحهم شبه بعض. متخسرش نفسك عشان تساعد حد يلاقي نفسه و متضغطش نفسك لحد ما صحتك تروح منك، ايمانك بربنا هو اللي هيناجيك من اي حاجة و في كل حاجة.
صحتك النفسية و حدودها و سلامتها و امنها مسؤليتك خالي بالك منها 🙂

أتمنى أن أبكي و أرتجف، التصق بواحد من الكبار"
لكن الحقيقة القاسية هي أنك الكبار
أنت من يجب أن يمنح القوة و الأمن للآخرين".

٧- متخافش و متحزنش ، ربنا مش بيسيب حد !!
دي حاجة شوفتها و اتعلمتها و حسيت بيها للاسف انها بتفرق حسب يقين كل واحد و للاسف انه بالوعي كده كلنا فاكريين حاجة و تصرفتنا وال لا وعي بيخلينا حاجة تانية و ده كان للاسف احد ابتلائتي اللي هزتني جامد ، و الحمد لله اديني لسه بكتشف الدرس.
متخافش تواجه نفسك و مخاوفها، متخافش تغلط، هتتعلم، متخافش تاخد مخاطر، متخافش تواجه المك و مشاعرك، خليك شجاع ، خليك حقاني، خليك نور. و افتكر انه خير الخطاؤون التوابون. متخافش علي منظرك و متخافش من الناس. كلنا فينل بلاوي بس ربنا اللي سترنا.

"أتعرف يا هذا ..لقد أرجعتك غريباً كما كنت
تخطيت كل مخاوفي من مواجهة ذكرياتي معك
واجهتها .. وبكيت ،بكيت كثيراً
كنت أريد أن أطهر جروحي وأبكي حتى تنتهي دموعي المخبأة، أنهيتها
وأنا الآن أقوى، أقوى بكثير مما تظن
وأرجعتك هذا .. يا هذا"

٨- ماتعش ترضي الناس، ارضي ضميرك!
في ناس اهم حاجة منظرها، و اهم حاجة الناس هتقول عليهم ايه و مين هيشوفهم ازاي. الحقيقة انه قلبك اهم و محدش هيشوفوه غير ربنا، ارضي ربنا، ارضي نفسك و ضميرك و متخافش من حاجة و افتكر ديماً ان العين مبتكرهش غير اللي احسن منها 🙂 عيش مبسوط و راضي عن نفسك احسن متعيش جبان عشان ترضي الناس، محدش رضي الناس و ارتضي ابداً

"إنك في أسوأ حالاتك لن يكرهك الجميع كما أنك في أفضل حالاتك لن يحبك الجميع ينبغي أن تؤمن بهذا المبدأ ..
وأنه كافٍ للغاية لتعيش بسعادة ورضا."

٩- عامل ربنا ، متعملش الناس!
كتير هتعمل حاجات و مش هتتقدر او حد يردهالك، و مش المفروض تكون مستني حاجة من حد، احنا بنستني من ربنا بس. مش سهلة بس ممكن مع الوقت تفهمها و تحسها.  احياناً من غير ما اقصد بعد اللي مريت بيه بلاقي نفسي بسأل ربنا ليه، طيب اعمل ايه، طيب اسيب الفطرة و ابقي زيهم، و لاقيت ربنا بيبعتلي رسايل ، اثبتي و اجمدي و كملي.  انا بسامح عشان ربنا يسامحني و الحقيقة اني مريت بأختبار اكبر مني و من اللي حوالياه عشان ربنا يثبتني علي المبدأ. ربنا عارف اني لو فقدت ايماني بالمسامحة وجعي هيبقي اكبر من اللي حصلي اللي هو اصلاً اكبر من اي تخيلات. سامح و عدي و حط كل حد في مكانه.

"إن أسوأ ما يمكن أن يصيب شخص شعوره بأن حدسه لم يَصدُقه وأن الذي ظنّه نجاهً أهلكه وأن الذي ظنّه هدايهً ضلله وأن الذي اختاره ليفنى في سبيله اختار غيره ليُفنى نفسه معه."

١٠- الغُسل !
الناس كل شوية تنتقد و تعلق و تسأل، مع اني عمري ما سألت حد انت بتشرب سجاير ليه و هي حاجة مؤذية او انت مبتصليش ليه و هي حاجة حرام او انتي مش محجبة ليه عشان ماليش حق. نفس الكلام علي الغُسل ، الاستنكار الرهيب ده بتاعك تخليه لنفسك، لان الغُسل من الحاجات اللي غيرتني و غيرت قلبي تماماً و عرفتني الدنيا علي حقيقتها. اتمني ان الناس كلها تمر بالتجربة دي عشان دي فعلا life changing experience بتفوق الواحد لحاله.

١١-متديش ظهرك لحد !
الا الخذلان ، متجيش علي حد مش مستني او متوقع منك كده. متكسرش قلب حد، متكشفش ظهر حد ، متخليش حد يسند عليك لو مش ساند نفسك، متوعدش حد حاجات مش قدها، متخيبش امال حد، متدمرش احلام حد و متكلمش علي حد و متحكمش و اعذر قد ما تقدر ، و متزعلش من حد لما يغلط بس حطه في مكانه الصح. متعشمش حد ، الا كسر الخاطر. ربنا اسمه العدل، و اسمه الجبار.

"كطفلٍ هرول الي امه باكياً لتحتضنه، فتلقي صفعه ليكف عن البكا، هكذا هو الخذلان"

١٢- مش كل اللي اكل معاك عيش و ملح اكله عشان يبقي عشرة، في ناس بتاكله طفاسه، عشان كده متعرفش حد نقطة ضعفك ولا ايه بيوجعك، متعرفش حد داخليات روحك او اللي يحسسك انك عريان قدامه. سبحان مقلب القلوب ، في ناس عندها قدرة انها تحط كل ده تحت رجلها و تعلي بيه و تسيبك تحت. سيدنا يعقوب قال لسيدنا يوسف " لا تقصص رؤيتك علي اخوتك فيكيدون لك كيداً" ما بالك بغيرهم.

١٣- كل واحد عنده مبرر لتصرفاته و غلطه، النية بتفرق ، الاعمال بالنيات و لكل امرءٍ ما نوي ، و النوايا ربنا اللي مطلع عليها ، متزعلش ، و علي نياتكم ترزقون و من اعمالكم سلط عليكم و إن يعلم الله في قلوبكم خيرا يؤتكم خيرا مما أخذ منكم و يغفر لكم  ف عامل ربنا عشان دي الحاجة الوحيدة المضمونه 🙂

١٤- متدورش علي اللي نقصك بره، اشتغل علي نفسك عشان لما تقابل حد تبقي عاوزوه عشان بي complement اللي مش مظبط عندك  مش بيديلك اللي ناقص. متجتمعوش علي سبب عشان كل الاسباب بتروح، اجتمعوا علي المودة و الرحمة و السكن. متدورش علي رحمة جوه حد الا لما تلاقيها جواك، و متسكنش حد مش هتعرف ترحمه 🙂
اسند نفسك، قوي نفسك، اقع، قوم، عافر و اقف هتوصل 🙂

"وأنت تحاول الغرق تأكد من أن مفتاح نجاتك في يد أمينة .. وأنه لن يُستخدم ضدك"

١٥- مش لازم ديماً تبقي صح، بس لو هتعمل حاجة اعملها صح :))) الصح من شخص للتاني مش هو هو، احياناً حاجتنا اننا نبقي صح بتحولنا لمكينات و بنسي الاعذار و بننسي الظروف و بنقسي علي بعض. العلاقات اهم و قلوبنا اهم و الدنيا فيها حاجات اهم من اننا ديماً نطلع صح 🙂

"النقاشات بين المحبين ينهزم فيها الأكثر حباً وليس الأقل حجة"

١٦- الظلم وحش، الظلم ضلمة في القلب و غشاوة علي العين و طمس علي المخ. ربنا يعفينا و يا بخت اللي ينام مظلوم ولا ينمش ظالم. و احقاقاً للحق ، كل اللخبطة الصحية و النفسية اللي مريت بيها الفترة اللي فاتت مالهاش اي علاقة تماماً ب my relationship status عشان كل الناس اللي ربطت ما بينهم و انا الحقيقة محبش اظلم حد. و من ضمن الحاجات اللي مش بحبها ، الفضول و النميمة و الغيبة و كلهم يقعوا تحت الظلم ، ربنا يدّي كل واحد علي قد نيته و اللي في قلبه 🙂

"الوقاحة، هي أن تَبتسم لي وقد أكلت من لحمي حتى جف لسانك والاستهانة، هي أن أعلم بكل ذلك وأبتسم لك"

١٧- عبروا عن مشاعركم ، احضنوا الناس ، بكلمكم و بايدكم ، لموا المتبعتر منهم خلوهم يحسوا بالامان 🙂

"أيدرك الأطفال حاجتنا لأحضانهم الصغيرة؟
وأن براءتهم بوسعها أن تحتضن الوحوش الكامنة داخلنا وتربت عليها بكل حبٍ فيسكُن الألم ولو قليلاً."

١٨- قيمتك مش في عربيتك ولا جزمتك ولا شنطتك ، قيمتك مش في صرفك ، مش في الشغلانة اللي قاتل نفسك فيها و مش اللغات اللي بتكلمها، قيمتك و راحتك في قلبك و نيتك الصافية:)

"أعان الله أصحاب الظنون السيئه فهناك مسافة طويلة جداً بينهم وبين الراحة"
مصطفي محمود

١٩- تلك الايام نداولها بين الناس ، و كما تدين تدان، مع روحك و مع بدنك و مع اللي حواليك. متحكمش علي حد , dont label, خليك رحيم بنفسك و بالاخرين، سامح.

"وَلْيَعْفُوا وَلْيَصْفَحُوا أَلَا تُحِبُّونَ أَنْ يَغْفِرَ اللَّهُ لَكُمْ وَاللَّهُ غَفُورٌ رَحِيمٌ"

٢٠- لا شيء يمرّ في حياتك عبث ، حتى تعثراتك الصغيرة كانت لأجل أن تعرف شيئًا ما ، لأجل أن تعي ، لأجل أن يتسّع أفقك وتزيد حكمة !

"‫لَا يُكَلِّفُ اللَّهُ نَفْسًا إِلَّا وُسْعَهَا ۚ لَهَا مَا كَسَبَت وَعَلَيْهَا مَا اكْتَسَبَتْ ۗ رَبَّنَا لَا تُؤَاخِذْنَا إِن نَّسِينَا أَوْ أَخْطَأْنَا ۚ رَبَّنَا وَلَا تَحْمِلْ عَلَيْنَا إِصْرًا كَمَا حَمَلْتَهُ عَلَى الَّذِينَ مِن قَبْلِنَا ۚ رَبَّنَا وَلَا تُحَمِّلْنَا مَا لَا طَاقَةَ لَنَا بِهِ"‬

اتمني انه حد واحد بس يقرا للاخر و يستفيد و ابقي انا كده I paid forward the lessons عشان صدقة الابتلاء تكون وصلت ..

PS: my rings are constant reminder of the 5 months and that I need to give the time some time, nothing great happens so fast!

نهاركم سعيد 💛🌸

العاصفة ٢٥/٤...

(امشي جمب الحيطة عشان من خاف سلم) versus ( امشي علي الحيطة عشان انا توكالي علي الله)

يوم التلات المفروض كان الجو زفت و هيبقي في عاصفة و حاجة نكد و الناس كانت مقلقة،اصل بالورقة و القلم، احوال الجو قبلها، توقعات خبراء الارصاد،  و الاخبار اللي انتشرت و التحذيرات ، العاصفة جايه لا محاله، و صادف انه يوم اجازة كمان، و الناس اخدت بالاسباب و قعدت في بيتها عشان مش طالبه قلق، و في ناس تانية صحيت الصبح يومها طلعت البلكونة لقت الشمس كويسة ، اخدوا باسبابهم اي ان كانت و نزلوا و قالوا لو الدنيا قلبت نبقي نرجع بيوتنا.

دول اسبابهم منطقية و صح و دول اسبابهم منطقية و صح.

بس في الاخر، ربنا خايب توقعاتنا كلنا و العاصفة محصلتش و كل كلام الخبراء راح في الوبا و الناس نكدت علي نفسها مع انهم اخدوا بالاسباب، و الناس اللي نزلت و غامرت برضه اخدوا بالاسباب و بسطوا نفسهم و مضيعوش يوم الاجازة.

اللي عاوزة اقولوه انه احيانا بالورقة و القلم و الحسابات و العقل ،الحاجة متبقاش ماشية بس الواحد عشان جواه مؤمن بحاجة تانية و عنده يقين و مش خايف و راميها علي الله يحصل اللي هو عاوزه و ربنا يخلف كل الظنون لصالحه عشان "لعل الله يحدث بعد ذلك امراً" و لان مفيش غيره "يدبر الامر" و "من توكل علي الله فهو حسبه" فالموضوع يطلع بسيط طول ما احنا هنشغل قلوبنا صح !

أَفَلَمْ يَسِيرُوا فِي الْأَرْضِ فَتَكُونَ لَهُمْ قُلُوبٌ يَعْقِلُونَ بِهَا أَوْ آذَانٌ يَسْمَعُونَ بِهَا ۖ فَإِنَّهَا لَا تَعْمَى الْأَبْصَارُ وَلَٰكِن تَعْمَى الْقُلُوبُ الَّتِي فِي الصُّدُورِ (46)

يا تعيش شجاع يا تموت جبان !

الحقيقة انه بعد رغي كتييييير جداً مع ناس اعرفها و ناس معرفهاش، و سماعي لمشاكلهم اقدر اجزم ان نص مشاكلنا جايه معانا من واحنا صغيرين، يا للاسف متحبيناش زي ما كنا عاوزيين يا متفهمناش من الاصل و اتفرض علينا اختيارات مش بتاعتنا بس مناسبة لماما و بابا و سوسو و توتو و المجتمع اللي حوالينا.

نص المشاكل التاني جيه لما كبرنا و رضينا و رضخنا للاختيارات دي و بقينا لا عارفين نكون اللي احنا عاوزينه ولا اللي الحوالينا عاوزينوا و بقينا مسوخ.

اللي زاد كمان، ان في ناس مكتفيتش بعدم الحب و التفاهم ده لكن كمان لما جم يتجوزوا و يعملوا عيله they settled .. و اتفجأوا انهم لا اتحبوا ولا اتفهموا تاني و كملوا عيشتهم مسوخ بتجيب مسوخ.

دول اللي انا بسميهم ماشيين جمب الحيطة!

لكن علي الصعيد الاخر، و بنسبة بسيطة جداً في ناس اهلهم ربوهم ميبقوش مسوخ و بيعافروا و بيحولوا و دول اللي تقريباً عايشين ماشيين علي الحيطة، مفيش حاجة بتجبرهم علي حاجة او بيمشوا بأعراف و تقاليد باليه.

 بس للاسف عشان محدش بيسيب حد في حاله، و كل واحد مدّي نفسه مطلق حرية التدخل في حياة الاخريين. لا المجتمع ولا اللي حواليهم سيبينهم في حالهم عشان هما عارفين انهم شجعان و للاسف ديماً العين بتكره الاحسن منها.

اظن انه ممكن حضرتك تفضل مسخ زي ما انت في حالك بس تسيب غيرك بيحاول ميبقاش، يتحاول انت كمان تكون انسان من غير متئذي اللي حواليك.

الخلاصه،يا تعيش انسان و تموت شجاع مش فايتك حاجة، يا تعيش مسخ و تموت جبان فايتك حياة...

عزيزي سليم!

عزيزي سليم،

اكتب لك هذه الرسالة، لأذكرك واذكر نفسي بما نسيه الاخرون. فلتتذكر ايضاً أني أحبك جداً، و أشفق عليك كثيراً لوجودك في هذا العصر. عصر القرود!

في عصر القرود، مشي الانسان علي القمر، و تحكم في الطاقة، و اشياء اخري لكنه بقدر تحكمه في هذه الاشياء بقدر ما قد فقد التحكم في نفسه و شهواته و بقينا امام انسان اقل رحمة، اقل مودة، اقل عطفا، اقل شهامة و اقل مروءة، و اقل صفاءاً من انسان العصر الزراعي المتخلف.
و قد نكون تقدمنا عشر خطوات للامام و لكننا رجعنا مائة خطوة و اكثر للخلف!
لم نعد ننتظر من السماء شيئا وظننا انه بتقدمنا قد اخذنا زمام الأمر في يدنا ..و خيل إلينا أنه لا سماء هناك و لا رب و لا مهيمن سوانا.. و نسينا الأوامر و الشرائع و الأعراف و التقاليد ..انطلقنا نعيش على هوانا ولم نعد نري غير انفسنا و لا نبالي لحال الاخريين و اصبحت الحياة حياة مادية صرفة .
وحينما يعيش الإنسان حياة مادية صرفة، تتغير المعايير، فالنفس لا تزداد شبعا بل تزداد جوعا و لا تزداد امتلاء بل تزداد خواء ثم هي تنتهي إلى حالة من الظلمة الحيوانية و القسوة و البلادة .. ثم تنتهي آخر الأمر بفساد الفطرة.
في عصر القرود، حينما يعيش الانسان حياة مادية، ينسي المودة و الرحمة و يتخيل ان الرحمة ضعفاً، و القسوة قوة، و يشغل حاله بالانتقام و التنكيل، يكثر بالقول و ينسي الفعل.يكن انانياً يطلب كل شئ ولا يرضيه اي شئ و لا يشبعه شئ.
في عصر القرود، أهل الحكمة في راحة و أهل الله في راحة .. لأنهم أسلموا إلى الله في ثقة و قبلوا ما يجريه عليهم و رأوا في أفعاله عدلا مطلقا دون أن يتعبوا عقولهم فأراحو عقولهم أيضا، فجمعوا لأنفسهم بين الراحتين راحة القلب و راحة العقل فأثمرت الراحتان راحة ثالثة هي راحة البدن.. بينما شقى أصحاب العقول بمجادلاتهم
‎أما أهل الغفلة و هم الأغلبية الغالبة فمازالوا يقتل بعضهم بعضا من أجل اللقمة و المرأة و الدرهم و فدان الأرض، ثم لا يجمعون شيئا إلا مزيدا من الهموم و أحمالا من الخطايا و ظمأً لا يرتوي و جوعا لا يشبع ...
‎فانظر من أي طائفة من هؤلاء أنت.. و اغلق عليك بابك و ابك على خطيئتك

في عصر القرود، و حتي تحافظ علي انسانيتك ابحث عن تلك التي تكون لك سكن و  اماً و زوجة و ملجأ، التي اذا احتجت تعطيك ما احتاجته دون ان تطلب، التي تعينك علي معرفة الله، التي تعطيك الامن و الامان،التي تستطيع ان تتخلص مما في صدرها من غل و تغلب في نفسها صفات التسامح، و اللين و المودة علي الغضب و الانتقام، ابحث في قلبها عن الرحمة و الحنان، التعاطف و المودة و الفهم لان ذلك ما يقام عليه البيوت.

حبيبي سليم، في عصر القرود، عندما تكبر لا تلتفت، فخلفك اشياء كثيرة سيئة و قد توجعك، سيحاول الاخرون ان يكسروك، فهناك من يكره تقدمك و هناك من يتمني ان يوقفك و هناك من يحلم بك خلفه. ان تكون وحيداً في الطريق الصحيح خيراً من ان تكون زعيماً في الطريق الخطأ. ان التفت ستسقط و ان سقط لن يرحموك. ان التفت قد تتعثر وسيحاول الكثير اسقاطك. كن شيئاً في مكان و لا تكن لا شئ في كل مكان. ارجو منك ان لا تلتفت ورائك ولا لمحاولاتهم الا اذا اردت ان تكون مثلهم و هذا قد يكسر قلبي كثيراً. عليك ان توعدوني ان تحاول جاهداً ان تحافظ علي قلبك نظيفاً و ان لا تفقد صفاء نيتك و لا ضحكت وجهك و لا فطرتك السليمة ولا روحك النورانية. عندما تكبر فلتعلم اننا كلنا نخرج من الدنيا بحظوظ متقاربة رغم ما يبدو في الظاهر من بعد الفوارق. فالله يأخذ بقدر ما يعطي و يعوض بقدر ما يحرم و ييسر بقدر ما يعسر. و لو دخل كل منا قلب الاخر لاشفق عليه و رأي عدل الموازين و ان اختل ظاهرها. فالله يمد يد السلوي الخفية و يحنو بيها علي المحروم و ينير بيها القلوب و يعوض الصابرين حلاوة، ثم يميل بيد القبض و الخفض فيطمس بصائر المترفين و يوهن قلوب المتخمين و يؤرق عين الظالمين. الله عدل.

في عصر القرود ،
كن رحيماً، فكلنا قادرون علي الحب و لكن قليل منا هم القادرون علي الرحمة. فأهل الرحمة هم اهل النور و الصفاء و لا يؤتيها الا كل شجاع كريم نبيل.
كن ليناً، هيناً، سهلاً، قريباً من الناس حتي و لو لم يقدروا منك ذلك، فانت تعامل الله و لا تعاملهم.
كن متسامحاً متصالحاً مع نفسك و مع الاخريين حتي و ان لم يفعلوا ذلك، و التمس لهم الاعذار، و عندما يجعلوك تفقد ايمانك فلتتذكر قول الله (وَلْيَعْفُوا وَلْيَصْفَحُوا أَلَا تُحِبُّونَ أَنْ يَغْفِرَ اللَّهُ لَكُمْ وَاللَّهُ غَفُورٌ رَحِيمٌ).
كن عطوفاً، ودوداً، كريماً، ناكراً لذاتك، راؤوفاً ، هادئاً، صبوراً، رحب الصدر، متريثاً، لانها صفات النورانيين الذين يحكمون الجانب الرباني في نفوسهم و يرتفعوا علي جبلتهم الطينية و البشرية.
كن حكيماً و جاهد نفسك دائماً، لانه الجهاد الاكبر الذي يستنهض بأشرف ما فيك.
كن وطناً و كن سكناً و مأوي للتائهين الذين لم يجدوا انفسهم بعد.
كن كالمطر، يروي، ليسقي، ليثمر.
كن متصدقاً، الكلمة طيبة صدقة، الابتسامة صدقة، اماطة الاذي عن القلوب صدقة و الصدقة بعشرة امثالها.
كن بصيراً بنفسك و عيوبها قبل ان تنظر للاخرين.
كن عوناً للناس دوماً، اترك اثراً و اعلم ان اي نور تتركه داخل احدهم يضيئك.
كن راضياً فاهل الرضا الي النعيم.


في عصر القرود،
لا تلقي باللوم علي احدهم، انظر بداخلك اولاً.
اذا ظـُلمت، لا تظلم، و اذا ظَلمت، رد المظلمة اوجب و ان جئت علي نفسك.
لا تبحث داخل احدهم عن ما ينقصك، و انتقاصك من الاخرين لا يزدك.
لا تكسر قلب احد و لا تطفئ احد.
لا تكذب- فالصدق ينجي و الكذب يؤدي بيك الي التهلة لا محاله.
لا تظلم احداً- فالظلم ظلمات يوم القيامة.
لا تتدخل في ما لا يعنيك - فا من حسن اسلام المرء تركه ما لا يعنيه.
لا تغتاب احدهم - فتظلمه بما لم يعد فيه و تبخس قدره.
لا تنظر للناس بعينك و تذكر ان العقل محله القلب و ان القلب ابصر من العين.
لا تقلل من نية احدهم و ان كان التنفيذ سيئاً.

في عصر القرود، كن انساناً و كفي!