عشان غالبا هي دي اجابة الامتحان

ساعات امتحانك هو ان تقابل ناس مش شبهك خالص، لا قلب ولا قالب، عشان تشوف حاجات مكونتش تتخيلها و تصرفات مكونتش تتوقعها، و اذي معدي اي تخيلات و بالرغم من كده تفضل تجاهد روحك انك متتغيرش، و تحاول تثبت علي اخلاصك في نيتك، علي مبادئك، علي نظافة قلبك، و علي هدفك عشان غالبا هي دي اجابة الامتحان .. و هتنجح لما تكتشف اذا كنت بترضي الناس ولا بترضي ربنا و نفسك و ضميرك.

ساعات تانية امتحانك هو انك ترد اذاهم ده بالدعاء ليهم و تدفع بالتي هي احسن وتكمل في طريقك بعيد عنهم انت و قلبك النظيف يمكن تنورلوهم السكة و يمشوا فيها من بعدك.

و يمكن امتحانك انك تفهم ان كل واحد بيشوف الدنيا بقلبه و مش معني ان قلبك نظيف ان الدنيا كلها كده و ان الناس اللي قلوبها بيضا و حياتهم بسيطة و سهلة بيشوفوا كل حاجة حلوة ، و بيعرفوا يسهلوا كل حاجة و عندهم من اللين و الرفق اللي يخلي عشرتهم جميلة، و في ناس من كتر ما قلوبها مريضة، بتبقي حاجتهم انهم يحسوا انك ناقص فوق حاجتهم انهم يعذروا و يقدروا و يحسنوا النية، و معندهمش اي مانع انهم يطحنوك و يكسروك و عندهم مبرراتهم كمان، و تبقي مش فاهم طيب انت اللي صح ولا هما الصح، طيب اتعامل زيهم ولا اعمل ايه و تبدأ تتلخبط في نفسك و في قيمك في الحياة و تخاف لكن ترجع تفتكر انك في الاخر بتعامل ربنا مبتعملهمش هما.

و يمكن درسك انك فاكر ان قلبك نظيف و هو اصلاً مليان بلاوي.

اما هما، اظن ان درسهم انهم يفهموا ان ربنا عدل و حق و مش بيبات مديون و ان الايام دول.

يا رب بصّرهم بنفسهم و نوّر قلوبهم و اشغلهم بحالهم و ابعد اذاهم عن نفسهم و عنا..