عشان الحسنة بعشرة :)

الدنيا دى بكل القرف والضغوطات اللى فيها لو ماشية متهونة ومتيسرة ومكملة فهيكون بعد رحمة ربنا بينا؛ ببركة الناس الحلوة اللى لسه على الفطرة .. الناس اللى اتعودت تدى وتحب وتوزع إنبساط بدون حساب .. شفت مرة واحد بيلوم ع واحد إنه طيب ومجدع بزيادة فالتانى رد عليه : ( إحنا بياعين يا عم .. اتعودنا إننا بياعين .. بياعين حنيه و بياعين حب و بياعين تقدير و ببلاش بدون مقابل .. بنبيع الحلو و اللي حابب يشتري يبقي كسب و اللي مش حابب يبقى خسر صنعتنا ).

احنا اللي بنزرع حب، رحمة، جدعنة، امان، سند، حنان، دفا و ورد -عشان دي الحاجات اللي بتسندنا لما الدنيا بتطلتش فينا. و عشان عارفين ان كل حاجة بنزرعها، هنجنيها في نفسنا، اهلنا ، صحابنا، شغلنا.

احنا اللي بنحب نفسنا و نسامحهاو نقبلها بعيوبها عشان مندورش علي اللي ناقصنا بره او يجي اللي ياخد اللي فاضل مننا و نلاقي نفسنا فاضيين. احنا المليانين و اللي عندنا منه بزيادة بنكبه علي الفاضي و بنوزعه بغض النظر

احنا اللي مبنكسرش حد، بنجبر الخواطر، بندخل القلوب نملاها مش بنفضيها، مش بنطفي النور جواهم و العيون بتلمع في وجودنا مش بتدبل. مش بندي ظهرنا لحد ، بنطبطب بالكلام علي بعض، بنشوف الناس بقلوبنا عشان القلوب ابصر من العين، بنسامح و نعذر، بنقع و نقوم نكمل معافرة عشان عارفين انها مش بتستني حد و جايه علي الكل.

احنا اللي بنحب و نحترم اي حد ، حب مالوش شرط او حالة، مش بيتغير بتغير الاحوال. بنحبهم عشانهم و لحسابهم ، بحلوهم ووحشوهم ، و هما يستاهلوا و هما ميستهلوش. بنحبهم عشان مفيش حد يستاهل انه ميتحبش زي ما هو عاوز. بنطمنهم و بنتصالح مع المسوخ اللي جوانا و بنساعدهم يتصالحوا مع اللي جواهم.بنسمعهم بقلبنا و نحضنهم بعينونا، مبنحكمش عليهم و بنحط نفسنا مكانهم و بنعذر، قابلنهم بعيوبهم و مشاكلهم.

احنا اللي مبنخفش من ظلم حد و لا الضلمة اللي جواهم، و بنعمل اللي في وسعنا عشان نوقف الاذي عندنا، و ننورلهم اللي ضلم فيهم و هما مش حاسيين.

احنا اللي عارفين ان اي نور هنسيبه جوه حد هيرجعلنا عشر اضعاف عشان الحسنة بعشرة .

لكل أولئك الذين أحبونا و لم نحبهم كما ينبغي نوراً و سلاماً طيباً و وردة
و لكل أولئك الذين احببناهم و لم يحبونا كما ينبغي سلاماً علينا نحن الذين نزهر القلبَ إذا نزلنا بها، كأننا
في بُقاعِ القلبِ أمطارُ

أودّ أن أقدّم شكري إلى الحب الذي يتيح لنا أن نرى الآخرين كما يراهم الله .
Jorge Luis Borges

شكراً ميادة علي الورد و الكلام اللي طالع من القلب!